路邊貓咪

*某日路過某鋪頭門前見到佢, 忍唔住影咗兩張...

**懶洋洋...食飽眠一眠....爽呀!

快搬屋了!!

都唔知係咪搬屋搬開有癮, 這幾年大小加加埋埋已搬了幾次, 全家由觀塘搬去慈雲山, 然後由慈雲山搬去上水, 再由上水搬去將軍澳, 現在再由將軍澳搬去九龍灣, 之前唔知自己住幾耐, 所以盡量少買傢俱, 家陣有的部份傢俱係人家搬屋唔要, 人棄我取, 前兩次call小型客貨van都可以攪掂, 今倘唔得, 因為有大件傢俱要拆同組裝, 要搵搬屋公司了!

原打算租家人居所附近或同區, 可惜放租盤不多, 唔係太貴就太舊, agent問租唔租套房? 唔係嘛, 單身女子租套房, 咪攪!  其實我要求好簡單, 要乾淨企理, 最好有洗衣機同雪櫃, 冇也可以, 於是跨區, 不過睇咗不下十個八個單位, 都係唔太企理, 都唔明點解d業主唔執好間屋先出租, 有d乾淨企理d, 但又距離理想租金一節, agent見我哋在考慮當中, 突然想起一個單位, 不過樓齡較舊, 即管去睇吓, 內籠都okay, 起碼第一眼望落乾淨企理, 加上有洗衣機同雪櫃, 於是拍板租此單位。

上星期六約搬屋公司送包裝物料嚟pack野, 竟然冇送嚟, 當時又唔得閑問, 過咗兩日先致打電話問, 佢攪笑到竟然答我話唔記得咗, 唔知要搬果日又會唔會唔記得呢!?   如果又唔記得, 到時唔知會定到噴煙呢!?

學影相

前陣子走去學影相, join咗一個數碼攝影入門, 諗住買部入門DSLR, 睇咗C記500D同N記D5000, 冇即刻買機, 諗住上一兩堂睇吓情況點先至買, 一上堂, cfu就叫我哋唔好買機住, 上完堂先買, 我呢d乖學生當然聽話, 不過就有d唔方便, 出外影時, 個個攞部大機出嚟影, 我哋只得部DC仔, 第一次外影, 發現每個同學仔d器材唔野小, 而且好齊備, 佢哋都唔知係咪真係入門, 有d ching 係d700, d300, d3x, 40d……心諗, 唔係化, 個個部機都唔係入門機, 咁都走嚟學入門!?

開初想買c記 500D or n記 d5000.  上完堂問cfu買乜機.  佢都唔建議買入門機, 買部好d, 佢應該都係n 派, 問c記, 好似唔想比意見, 問n記, 一講就話d700, 嘩...好貴啊!  d300s都好, 睇過d price, 淨body都好似要over 10K, 加埋lens 接近 20k....剛剛開始玩, 好似貴咗d喎!  另外, 考慮緊50d, around 10K for kit set……..啊…原來玩影相都係…要有$$ gar......!!

凍薪 + no B仔 >_<

終於知道結果, 其實同事們都有心理準備, 不過唔多唔少仍抱一絲絲希望….

這下子今年過年可慘了….每逢過年一般支出會多D,  再加上要搬屋…

唔想明年都係咁, 一係努力搵多D客, 一係努力搵過份好工…..!!!!

為食之過 >_<

又要補牙嘞, 之前經驗個兩、三次因為食嘢唔小心整崩咗 d 牙, 要補牙, 已經覺得好唔抵, 唔補又唔得, 唔想做崩牙妹, 家陣食嘢已經好小心, 可惜都係避唔到, 上星期六睇電視時, 食包橡皮可樂糖, 竟將之前補牙嘅牙粉癡咗出嚟, 十元八塊包糖, 家陣要花幾佰蚊補牙, 真係唔抵, 唯有叫自己除咗再要小心d外, 諗都係要戒食橡皮糖嘞!!

Season's Greetings from Lazy Sleepy

又到聖誕, 2009年快要過去, 祈望大家可以與至親渡過這歡樂的日子!!

送上小小心意及祝福, 願耶穌的平安、喜樂和愛滿足你們的心!!

鯇魚 vs. 脆肉鯇魚

平日都是老爸帶同高思雅買餸煮飯, 昨天放假一天, 由我來做, 晚飯最基本是三餸一湯, 於是到街市, 高思雅跟老爸去得街市多, 所以買甚麼都知道到那一檔買, 跟她說買甚麼, 她就帶我到那檔門前, 不過諗每餐吃甚麼也不易, 行行吓想到不如蒸淡水魚, 不記得平時吃的是甚麼魚, 走到魚檔前, 問高思雅通常買多數份量, 甚麼也沒有問檔主, 便指着我們認為大小合適的魚塊便買回家了。

蒸魚通常蒸十多二十分鐘便熟, 要知道是否熟, 用筷子穿過魚身看是否熟了, 十五分鐘, 穿不過, 廿多分鐘, 依然不能, 仔細再看, 原來買回來的是脆肉鯇魚, 怪不得蒸了那麼久仍穿不過魚身啦。 

脆肉鯇魚肉地比較硬, 通常是火鍋材料, 不會清蒸, 而清蒸的, 應該是一般的鯇魚, 今倘真失策, 竟買了脆肉鯇魚來清蒸, 換來給大家笑的機會, 沒法子, 誰叫自己做了此傻瓜事!

最終唯有我用刀叉將魚肉分拆成小件供大家享用, 否則, 可能原封不動留在碟上, 因為以我們的筷子功力, 根本不可能將魚肉分拆來吃!